صينية السمك بالبشاميل

ما تستغربيش كده من العنوان ما زي ما فيه مسقعة بالبشاميل وكوسة بالبشاميل فيه كمان سمك بالبشاميل وعلى فكرة الصينية دي طعمها حلو جدا وخفيف جدا جدا على المعدة..
المقادير:-
• كيلو سمك فيليه.
• عصير خمس ليمونات.
• 1/4 كوب زيت عباد الشمس.
• 3 معالق كبيرة زبدة.
• كوب دقيق.
• 1/2 1 كوب لبن.
• معلقة كبيرة كمون.
• 1/4 كوب عين جمل مفروم "اختياري".
• 1/2 كوب لوز "اختياري".
• ملح وفلفل.
• بهارات سمك.
• 5 فصوص ثوم.
• قرن فلفل أحمر مقطع قطعا صغيرة.
• حزمة شبت مقطعة قطعا صغيرة.
الطريقة:-
1. هاتِ فصوص الثوم وقرن فلفل أحمر وقطعيه قطعا صغيرة وحطيهم في الهون ومعاهم الملح والكمون والبهارات واطحنيهم كويس مع بعض.. بعد كده ضيفي إليهم الليمون وقلبيهم مع بعض.
2. هاتِ السمك واغسليه كويس وبعد كده رشي عليه الخلطة السابقة اللي إنتِ عملتيها وضيفي إليه حزمة الشبت وسيبيه لمدة نص ساعة علشان يتبّل كويس.
3. أثناء ما السمك بيتبّل اسلقي اللوز لمدة 10 دقائق وبعد كده قشريه وقطعي كل لوزة إلى 4 قطع بالطول وبعد كده حمصيه في الفرن أو حمريه في الزيت.
4. بعد كده ابدئي في عمل البشاميل عن طريق إنك تحمري الدقيق في الزبدة لغاية لونه ما يبقى ذهبي وبعد كده ضيفي إليه اللبن بالتدريج مع التقليب المستمر علشان الدقيق ما يكلكعش منك... سيبيه على النار لمدة خمس دقائق أو لغاية ما تلاقي إن الخليط بقى أملس.
5. اخلطي اللوز وعين الجمل والبشاميل مع بعض كويس.
6. هات صينية الفرن وادهنيها بالزيت ورصي فيها شرائح السمك الفيليه وبعد كده ضيفي إليها البشاميل بس خدي بالك إنك تساوي البشاميل في الصينية.
7. شغلي البوتاجاز على درجة حرارة متوسطة ودخلي الصينية وسيبيها لمدة ساعة أو لغاية ما وش الصينية يبقى ذهبي خرجيها واستني عليها شوية لمدة ربع ساعة وبعد كده قطعيها بالسكينة...ممكن مع الطبق ده تعملي طبق سلطة خضراء...